சிதறல்கள்

சாரல் (1)

2008-11-01T02:03:00.000-07:00

குடைக்குள் மழை

மழை வரும்போதெல்லாம்
குடை விரிப்பவன் நான்
சிறு தூரலோ பெரு மழையோ
என் குடை மலர்ந்து நிற்கும்

முகத்தில் சாரல் படர்கையில்
சிலிர்ப்பவர்களைப் பார்த்து சிரித்திரிக்கிரேன்
குடை விளிம்பில் வழியும் அருவியுடன்
விளயாடுபவர்களோ என்னைப் பார்த்து சிரிப்பவர்கள்

என் குடையிலிருப்பது
துருப்பிடித்த கம்பிகளும்
எப்போதோ வானம் மறைத்த
சில கருப்பு கிழிசல்களும்

மழை எல்லோருக்கும் பொது
இது என் குடை
என் குடைக்குள் விழும் மழை
என் மழை

சாரல்

2008-11-01T01:54:00.000-07:00

மெலிதாய் ஒரு மழை...

ஜன்ன்லோர இருக்கையில் ஒரு பேருந்து பயணம்..

மழையின் சாரல் முகத்தில் சிலிர்க்க..

மனதில் ஒரு சுகம்...

அதே போன்ற உணர்வுதான் என் நண்பனின் படைப்புக்களை படிக்கையில் ..

அந்த படைப்புக்களை என் பதிவில் சாரல் என்ற தலைப்பில் வெளியிடுகிறேன்..

Keep Reading :)

2008-09-30T19:26:00.000-07:00

கொலு வைக்கலையோ கொலு
______________________
நவராத்திரி என்றாலே ஒரு பெரிய சந்தோஷம். ஏன்னு கேக்கரீங்களா? இந்த ஒரு பண்டிகையத்தான் ஒன்பது நாள் கொண்டாடலாம். என் புகுந்த வீட்டில் கொலு வைக்கும் பழக்கம் கிடையாது. ஆனாலும் என் பிறந்த வீட்டில் இந்த பழக்கம் உண்டு என்பதால் திருமணத்திற்கு பின்னும் கொலு வைப்பதை நான் நிறுத்தவில்லை. என் மாமியாருக்கும் கொலு வைப்பது பிடித்திருந்ததால் ஒரே கொண்டாட்டம்தான்.

இப்ப நாங்க சிங்கைல இருப்பதாலே விமரிசையா ஒன்பது படி வைக்காட்டியும் இந்த முறை சற்று சிறியதாக வைத்துவிட்டோம்.

சரி அது இருக்கட்டும் இந்த கொலு வைக்கற சாக்கில் வீட்ல ஒரு களேபரம் நடக்கும் பாருங்க...அத பத்திதான் அடுத்து எழுதப்போரேன்.

இப்போதைக்கு அனைவருக்கும் நவராத்திரி வாழ்த்துக்கள்

ஆசிரிய தின வாழ்த்துக்கள்

2008-09-05T06:23:00.000-07:00

எல்லோருக்கும் ஆசிரியர் தின நல்வாழ்த்துக்கள்.

வரும் தலைமுறையினர் இது போன்றதொரு ஆசிரியரை பார்க்காதிருக்கட்டும்.

இதைப் பார்த்த உடன், என் நண்பனது பதிவு ஒன்று ஞாபகம் வந்தது. அவர் இந்த மாதிரி நல்லாசிரியர்களிடம் மாட்டாம போயிட்டாரேன்ற ஒரே ஒரு குறை இருக்கு ;)

நண்பர பதிவுலகின் பக்கம் பாத்தே பல வருஷம் ஆச்சு... நட்சத்திரமானாத்தான் எழுத வர்றதுன்னு என்ன மாதிரியே எதுவும் விரதமா ;)

நீங்களே சொல்லுங்க இது நெசமா?

2008-09-05T05:36:00.000-07:00

என்னுடைய நண்பனொருவனுக்கு இன்று பிறந்தநாள். அவன அப்டி இப்டி திட்டி தாஜா பண்ணி ட்ரீட் கொடுக்க சொல்லி நட்சத்திர ரொட்டி (bucks க்கு ரொட்டின்னு ஒரு அர்த்தம் இருக்கு தெரியுமா? காசு-னு வச்சுக்கிட்டா கூட பெயர் பொருத்தம்தான்) காஃபிக்கடைக்கு கூட்டிட்டு போனேன்.

அங்க போய் ஆளுக்கொரு ஆளுயர கோப்பைல காஃபி சொல்லிட்டு வழக்கம் போல மாமியார்-மாமனார் பண்ற லொள்ளு, என் பொண்ணு படுத்துற பாடு, என் கணவன் பண்ணின அட்டூழியங்கள்னு சொந்தக் கதை சோகக் கதையா சொல்லிக்கிட்டு இருந்தேன். அப்ப அவன் சடார்னு ஒரு கருத்த சொல்லிட்டுப் போயிட்டான். இத்தனைக்கும் புலம்பும்போதும் அவங்கள பத்தி உள்ள நல்லதெல்லாம் சொல்லி புலம்பற ஆளுங்க நான்.

ஏண்டான்னு கேட்டா பெரிசா ஒரு விளக்கம் வேற குடுத்தான். அவன் சொல்றதுல உண்மை இருக்கான்னு உங்ககிட்ட கேக்காம வேற யார்ட்ட கேக்றது. நீங்களே சொல்லுங்க 'கல்யாணமான பின்னால ஆண்-பெண் நட்பு விட்டுப் போறதுக்கு இல்ல சின்ன விரிசல் விழறதுக்கு இந்தப் புலம்பலா காரணம்'?

அவன் என்ன விளக்கம் கொடுத்தான்னு கேக்கறீங்களா?

நானும் இதே அட்டூழியங்கள்லாம் என் மனைவிகிட்ட செய்றேன், எங்க வீட்லயும் இதே பிரச்னை பல ரூபங்கள்ல அலைஞ்சுகிட்டு இருக்கு. அதுனால உன் கதைய கேட்டா ஏதோ எந்'தங்கமணி'யே உன்கிட்ட புலம்பி அவருக்கு கொஞ்சம் நல்ல புத்தி சொல்லுங்கன்னு சொல்லி நீ புத்தி சொல்ற மாதிரியே இருக்குன்றான்!

நீங்களே சொல்லுங்க இது நெசமா?

இனிது இனிது

2008-09-02T07:59:00.000-07:00

முதலில் அனைவருக்கும் விநாயக சதுர்த்தி நல்வாழ்த்துக்கள்...

இன்று காலையில் இருந்தே எங்கள் வீட்டில் பட்டிமண்டபம்தான்...
என் கணவர் தெலுங்கு..நான் தமிழ்....அதனால் விநாயக சதுர்த்திக்காக தமிழ் பாடல் போடுவதா...தெலுங்கு பாடல் போடுவதா..என ஒரு சிறு ஊடல்...

யாமறிந்த மொழிகளிலே தமிழ் மொழி போல் இனிதாவதெங்கும் காணோம்..என நானும்...

சுந்தரத் தெலுங்கினில் பாட்டிசைப்போம் என என் கணவர்...

தமிழ் இனிதா...தெலுங்கு இனிதா...என்று நாங்கள் பேசிகொண்டிருக்க....

என் ஒரு வயதே நிரம்பிய மகள்...அம்மா..என்று குரல் குடுக்க...

அந்த மழலையின் குரல் கேட்ட பின்னர்..ஊடலாவது ஒண்ணாவது...

இதைத்தான் சொன்னாரோ வள்ளுவர்
"குழலினிது யாழினிது என்பர் தம்மக்கள்
மழலை சொல் கேளாதவர்"

தீ நகர்

2008-09-02T07:26:00.000-07:00

ஹாய் மதன்: கேள்வி பதில்
விக்கிரமாதித்தன், ஜேடர்பாளையம்.
இந்தியாவில் உள்ள பெரிய குறை என்ன?
மக்களின் அசாத்தியப் பொறுமை!

நான் சொல்ல வந்த செய்தி என்னமோ மேலேயே முடிந்து விட்டது. இருந்தாலும் சமூக அக்கறை உள்ள இரண்டே இரண்டு பெயர்களை குறிப்பிட்டாக வேண்டுமென்ற ஒரே நோக்கில்...

எம்.ஏ.ஜவஹர் இதே தலைப்பில்,ஜூனியர் விகடனில் கோபசாரியின் டைரியிலிருந்து என்ற பகுதியில் இந்த வருட ஆரம்பத்தில் ஒரு கட்டுரை எழுதியிருந்தார். வழக்கம் போல் செவிடம் காதில் ஊதிய சங்கானது. நெருப்புன்னா வாய் வெந்துராது என்பார்கள்... ஆனால் அன்னைக்கு நெருப்புன்னு சொன்னது இன்னிக்கு வெந்து தணிஞ்சுருக்கு!

அடுத்ததா டிராஃபிக் ராமசாமி, சமீபத்தில கருணாநிதிய எதிர்த்து ஜெயிலுக்கெல்லாம் போனாரே அவர்தான், அவரும் இது விஷயமா ஒரு வழக்கு போட்டாரு. அது தலைல கல்லப் போடு இல்ல கமிஷனப் போடுன்ற பாணியில அந்த வழக்கு இன்னும் தூங்குது!

பி.கு: மேலே சொன்ன விகடன் முகவரி எடுப்பதற்காக போனால் ஓடும் வரிச் செய்தியில் கீழ் கண்ட வாசகம்...

சரவணா ஸ்டோர்ஸ் தீ விபத்து: விதிமுறைகளின்படி கட்டியிருந்தால் இழப்பு ஏற்பட்டிருக்காது:முதலமைச்சர் கருணாநிதி கருத்து

தலைல அடிச்சுக்கிட்டேன்... என் கேள்வியெல்லாம் ஒண்ணே ஒண்ணுதான் முதலமைச்சர் கருத்தின் அடிப்படையில் உங்களுக்கு இழப்பீடு கிடையாது என்று இன்ஷ்யூரன்ஸ் நிறுவனங்கள் சொல்லுமா? ஒருவேளை மேலே இரண்டு பேர் செய்ய நினைத்ததை இது செய்யலாம்!

அது சரி... நாம் மெய்யாலுமே அசாத்தியப் பொறுமைசாலிங்கதானோ...

வால்-இ - திரைப்பார்வை

2008-08-31T22:53:00.000-07:00

குசேலன், சத்யம், தாம் தூம்... என்று நம் படங்கள் தொடர்ந்து சோதிக்க சென்ற வெள்ளிக் கிழமை (wall-E) வால்-இ என்ற ஆங்கிலப் படத்திற்கு சென்றோம். ஆங்கிலப் படமென்றால் பொதுவாக விமர்சனங்களைப் படித்துவிட்டு முழுக் கதையையும் தெரிந்த பின்னே செல்வது வழக்கம். மொழி தெரியாத இடத்துல போய் கழுத்துல வெட்டு வாங்கக் கூடாது இல்லிங்களா?

ஆனால் வால்-இ விஷயத்தில் தலையும் புரியாமல் 'வால்'-ம் புரியாமல் போய் உக்காந்தாச்சு. பிக்ஸர் நிறுவனத்தின் மேல் நம்பிக்கை இருந்தது வேறு விஷயம். வழக்கம்போல் இந்த முறையும் குடுத்த காசுக்கு குறை வைக்கவில்லை... இல்லை இல்லை மேலே சொன்ன எல்லா தமிழ் படங்களில் விட்ட காசக் கூட திருப்பி கொடுத்து விட்ட திருப்தி.

உலகம் அழிந்த பின்னர் வரும் ஒரு மயான அமைதியுடன் ஆரம்பிக்கிறது படம், வானுயர்ந்த கட்டிடங்கள் வழியாக பயனிக்கும் கேமரா அருகே செல்ல செல்ல உயர்ந்த கட்டிடங்கள் அனைத்தும் குப்பைகள் என்று தெரிய வரும்போது வரும் அதிர்ச்சியை தவிர்க்க முடியவில்லை. குப்பைகள் அதிகம் சேர்ந்து மனித இனமே வாழ இயலாத அளவுக்கு, கிபி 2700ம் ஆண்டு பூமி மாறி விடுகிறது.

வால்-இ என்ற ஒரே ஒரு ரோபோ மட்டும் பூமியில் குப்பைகளை பிரித்து அமுக்கி செங்கலாக்கி அடுக்கி வைக்கும் வேலையை செய்து கொண்டிருக்கிறது. சதுர தகரத்தில் உடம்பும், முட்டை முட்டையாய் இரண்டு பைனாகுலர் கண்ணுமாய் முதல் பார்வையிலேயே மனத்திற்கு இனக்கமாகி விட்டது. முதல் 40 நிமிடங்களுக்கு வசனங்களே கிடையாது. மொத்தப் படத்திற்கான வசனத்தை ஒரு பாக்கட் நாவல் பக்கத்தில் எழுதிவிடலாம்.

வால்-இ, குப்பைகளை பிரிக்கையில் கண்ணில் படும் விளையாட்டு சாமான்களை பத்திரப்படுத்தும் போது நமக்கு நெருங்கிய நண்பனாகி விடுகிறது. குப்பை மேட்டில் ஒரே ஒரு செடியைப் பார்த்து அதை ஒரு பிய்ந்த காலணியில் வைத்து தண்ணீர் ஊற்றி வளரச் செய்யும் அழகே அழகு. பின்னர் அதை விட தொழில்நுட்பத்தில் சிறந்த ரோபோ ஒன்று வேறு கிரகத்திலிருந்து வருகிறது. முதலில் பயந்து ஒளியும் வால்-இ, அது மின்சாரம் தாக்கி செயலிளக்கும் போது உதவ இரண்டும் நெருக்கமாகி விடுகின்றன.

வால்-இ என்றும் ஈவா என்றும் இரண்டும் மாற்றி மாற்றி அழைக்க அது இந்த வருடத்தின் மிகச் சிறந்த காதல் வசனமாகி விடும் அனுபவத்தை நீங்களே நேரில் பார்த்து உணர்ந்து கொள்ளுங்கள். (என் அலைபேசியின் அழைப்பொலி வால்-இ-ஈவா தான்!) பழைய காதல் பாடலொன்றை தொலைக் காட்சியில் பார்த்து, வால்-இ ஈவாவின் விரல்களைப் பற்றும் ஆசையில் நெருங்கி அது கைகூடாத தருணங்களில் நாம் பார்ப்பது ரோபோக்கள் என்ற உணர்வே வருவதில்லை. ஆகச் சிறந்த ஒரு காதல் ஜோடியின் மிகச் சிறந்த தருணங்களை பார்க்கும் உணர்வே மேலோங்குகிறது.

வால்-இ ஈவாவுக்கு அந்த செடியை காதல் பரிசாக அளிக்கிறது. பின் அதுவே வேற்று கிரகத்தில் இருக்கும் மனிதர்களுக்கு பூமி மறுபடியும் உயிர் இருப்பதற்கான சாட்சியமாகிறது. மனிதர்கள் தன் தாய்மண் தேடி வந்தார்களா? வால்-இ, ஈவாவின் விரல்கள் இணைந்தனவா? என்பதை மிக மிக சுவைபட கூறியிருக்கும் Andrew Stanton ஆன்ட்ரூ ஸ்டேண்டன்க்கும், இந்த இரண்டு ரோபோக்களின் குரல்களை உருவாக்கிய Ben Burtt பென் பர்ட்-க்கும் பாராட்டுக்கள்.

அய்யய்யோ முழு கதையையும் சொல்லி உங்கள் பார்க்கும் அனுபவத்தை கெடுத்து விடப் போகிறேன். மொத்ததில் இந்தப் படம் பார்த்து முடிக்கும் பொழுது இரண்டு சொட்டு கண்ணீர்த் துளிகளுடன் சிரித்துக் கொண்டு வெளியேறுவீர்கள், உங்களது காதலன்/காதலி/கணவன்/மனைவியை இன்னும் கொஞ்சம் காதலாய் பார்ப்பீர்கள், மக்கும்/மக்காத குப்பையை கவனமாக பிரித்துப் போடுவீர்கள், ஒரே ஒரு செடியாவது வைத்து தண்ணீர் ஊற்றும் ஆசை அதிகரித்து இருக்கும், வாய்ப்பு வசதி இருக்கிற மவராசனுங்க அதையும் செஞ்சுருப்பீங்க! Gudos Pixar!

*அட நான் கூட...

2008-08-31T22:18:00.000-07:00

கல்யாணம் பண்ணிப் பார்... வீட்டை கட்டிப் பார்... குழந்தை பெத்துட்டு blog எழுதிப் பார்-னு பெரியவங்க சும்மாவா சொன்னாங்க. குழந்தை பிறந்ததற்கு அப்புறம் கொஞ்சம்னா கொஞ்சம் கூட நேரமே இல்ல, இந்த சமயம் பாத்து நீங்க நட்சத்திரப் பதிவாளரா தேர்ந்தெடுக்கப்பட்டு இருக்கிறீர்கள் ஒரு மடல் வந்தா சிரிப்பீங்களா அழுவீங்களா?

ஆனா இந்த வாய்ப்பைக் கூட விட்டுவிட்டால் நான் மறுபடியும் பதிவுலகம் பக்கம் வருவதே சந்தேகத்துக் குறியதாகி விடும் என்ற ஒரே காரணத்திற்காக எழுத முயற்சிக்கிறேன். என்வே குறை குற்றங்களை பொறுத்தருள்க.

அப்பப்ப வந்து வலைப்பூக்கள வேடிக்கை பார்க்கிறதோட சரி, தமிழ்-ல எழுதியே பல காலம் ஆச்சு. அதுனால என்னடா நட்சத்திரப் பதிவே இப்படி மொக்கப் பதிவா இருக்குன்னு யாரும் நினைக்காம கொஞ்சம் ஆதரவு தாங்க இந்த வார இறுதிக்குள் ஒரே ஒரு நல்ல பதிவாவது போட்டுவிடுவேன்.

தமிழ்மண நிர்வாகிகளுக்கும் நான் நட்சத்திரமாக தேர்வாக இருந்த எல்லா காரணிகளுக்கும் மிக்க நன்றி! மீண்டும் ஒரு முறை 'அ' எழுத உதவியதற்கு!

அட நான் கூடவா...

2008-04-21T01:38:00.000-07:00

சில வருடங்களுக்கு முன் குழந்தைகள் உள்ள உறவினர் வீட்டுக்கோ அல்லது நண்பர்கள் வீட்டுக்கோ சென்றால் அவர்கள் அந்த குழந்தையை அத சொல்லி காமி இது பண்ணி காமி என்று படுத்தும் பாட்டை பார்த்தால் பாவமாக இருக்கும்...என்னம்மா இது மனசாட்சியே இல்லாம சின்ன குழந்தையை கஷ்ட படுத்தறாங்க என்று அலுத்துக்கொண்டுள்ளேன்...
இன்று...
அம்மா..என் பொண்ணு இப்பவே எல்லாருக்கும் டாட்டா காமிக்கரா பாரு
இதோ என் 8 மாத குழந்தையை டாட்டா காமி என்று படுத்திக் கொண்டிருக்கிறேன்..
சே நான் கூட...:(

முதல் முதலாய்...

2006-11-08T03:46:00.000-08:00

முதல் முதலாய்...(1)

இது கண்டிப்பா லேசா லேசா பாட்டு இல்லீங்க.
முதல் முதலாய் நிகழும் சில அனுபவங்கள் மறக்க முடியாதவை...
முதல் முதலா மேடைல பேசின அனுபவம்தான் இது.

அப்ப 6வது படிச்சிட்டு இருந்தேன். அது வரைக்கும் பேச்சு போட்டில எல்லாம் சேந்ததே கிடையாது. புது பள்ளிகூடம் வேற.ஸ்கூலுக்கு போகும்போதே அம்மாவோட அறிவுரை..பாருமா நல்ல படிச்சா மட்டும் போதாது எல்லா போட்டியிலும் சேரணும் நிறைய பரிசு வாங்க்கணும்னு. அதுக்கு ஏத்த மாதிரி பல பள்ளி மாணவர்களும் கலந்துக்கர ஒரு பேச்சு போட்டில முதல் ஆளா பேர குடுத்துட்டேன். போட்டி வர்ற சண்டே அதுவும் பத்மா சேஷாத்ரிலன்னு சொன்னாங்க.தலைப்பு - என்னை கவர்ந்த குறள்.
வீட்டுக்கு போனதும் அம்மா,அப்பா,பாட்டி,தாத்தா..எல்லார் கிட்டயும் இத பத்தி பெருமையா சொல்லிட்டேன்.
சரி இப்ப எனக்கு யாரு எழுதி தரப்போறிங்க..
உனக்கு பிடிச்ச குறள்னுதானே தலைப்பு..அப்ப நீதானெ எழுதணும் என்று இந்த ஒரு விஷயத்தில் குடும்பமே ஒத்துமையாய் இருக்க வேறு வழியில்லாமல் தமிழ் ஆசிரியை அன்றைய வகுப்பில் எடுத்த அன்புடைமையில் எனக்கு பிடித்த ஒரு குறளை பற்றி எழுதி படித்தும் விட்டேன். பின்னர் தினமும் கண்ணாடி முன் நின்று பேசிப்பாத்து ஒரே கொண்டாட்டம்தான்.
கடைசியில் அந்த பொன்நாளும் வந்தது.

நான் என்ன சொல்லியும் கேக்காமல் முதல் தடவ மேடையில பேச போற அதனால பட்டு பாவாடை சட்டைதான் போடணும்னு சொல்லி...கிட்டதட்ட ஒரு நடனப் போட்டி போற மாதிரி தயாரானேன்.
அப்பா நீங்க என்னை பள்ளியில விட்டுட்டு போயி ஒரு 1 மணி நேரம் கழிச்சி திரும்பி வந்து கூட்டிட்டு போங்க என்றேன்.
போடி முதல் தடவ மேடைல பேச போற நான் அப்பா ரெண்டு பேரும் வந்து நீ பேசி முடிக்கரவரைக்கும் இருந்து உன்னை கூட்டிட்டு போறோம்..இது அம்மா

என்ன அப்படி சொல்லிட்ட என் பேத்தி பேச போறா நா இல்லாமலா என்று பட்டு புடைவையில் என் பாட்டி..நல்ல வேளை தாத்த பட்டு வேட்டி எல்லாம் போடாமல் கதர் அணிந்திருந்தார்...ஆக பேச்சு போட்டிக்கு குடும்பத்தோட போன முதல் ஆள் நானாத்தான் இருப்பேன்.

போனவுடன் அனைவரையும் ஒரு வகுப்பில் அமரச் சொன்னார்கள். என்னை தவிர எல்லோரும் பள்ளி சீருடையில் இருந்தார்கள்.அம்மாவை நன்றாக முறைத்தேன்.

நடுவராக மூவர் வந்து அமர்ந்தார்கள். இத பாரு நீ முதல் பென்ச்சுல போயி உக்காரு. எல்லார் பேசரதயும் நல்லா கவனி. என்று அம்மா சொன்னவுடன் முதல் பென்ச்சில் போய் உட்கார்ந்தேன். அதுவரை இல்லாத பயம் திடிரென்று தொற்றிக் கொண்டது. எல்லோர் பேசுவதையும் கேட்டு அது இன்னும் அதிகமாகிவிட்டது. எங்கள் பள்ளி பெயரை அறிவித்கார்கள். எங்கள் பள்ளியில் இருந்து நானும் இன்னுமொரு மாணவியும் வந்திருந்தோம்.முதலில் அந்த மாணவி சென்று அடக்கமுடைமை பற்றி பேச எனக்குள் பயம் அடங்காமல் ஆடியது. கடைசியில் என் பெயரையும் அறிவித்துவிட்டார்கள்.

குறளில் என்னை கவர்ந்த குறள் எது என்பதை என் குரலில் கூறவே இங்கு வந்தேன் என தெம்பாய் ஆரம்பித்து தெரியாமல் என் அம்மாவையும் அப்பாவையும் பார்த்து விட்டேன்..அவ்வளவுதான் அதன் பின் ஒரு வார்த்தை கூட நினைவுக்கு வரவில்லை..அன்புடைமை பற்றி மறந்துவிட்டு என்னை கவர்ந்தது அடக்கமுடைமை என்று உளர...என் அம்மாவின் முகத்தில் கலவரம். அதன் பின்னர் ஒரு 2 நிமிடத்துக்கு அதாவது அதாவது என்று பேந்த பேந்த முழித்து பின்னர் அங்கேயே அழுது விட்டு மேடையில் இருந்து கீழெ இறங்கினேன்..

பரவாயில்லைம்மா அழாதே என்று நடுவர்கள் ஆறுதல் கூற...என் பட்டு பாவாடை வேறு..அது எல்லொருக்கும் என்னை நன்றாக அடையாளம் காட்டி விட்டது...
அப்புறம் என்ன..இதுக்கு மேல இனிமே அவமானப்பட முடியாது என்று தெரிந்ததால் அதன் பின்னர் அனைத்து பேச்சு போட்டியிலும் துளி கூட பயமே இல்லாமல் கலந்து கொண்டது வேறு கதை...!!! ஆனால் இந்த முதல் அனுபவம் மட்டும் என் பயத்தை போக்கியது உண்மை.

ஊரார் பிள்ளைய...

2006-11-06T00:56:00.000-08:00

ஊரார் பிள்ளைய...

டேய்..அந்த உண்டிய வெச்சு என்ன பண்ணிட்டு இருக்க...

இல்லம்மா பாட்டி ஒரு தடவ கதை சொன்னன்ங்க. மத்த வீட்டு பசங்கள நாம பாத்துண்டா நம்ம வீட்டு பசங்களகடவுள் பாத்துப்பார்னு

அதுக்கு உண்டிய எதுக்கு உடைக்கறடா

அம்மா நீ திட்டினன்னு பாட்டி வீட்ட விட்டு போயிடிச்சு. அதான் கோவில் முன்னாடி ஒரு பாட்டி தினமும் அங்க வர்ரவங்ககிட்ட காசு கேப்பாங்க..அவங்களுக்கு கொண்டு போய் இந்த காசு போடபோறேன். அப்படி பண்ணா என் பாட்டிய சாமி பாத்துக்கும் இல்ல..

அங்கே உடைந்தது உண்டி மட்டும் அல்ல என் மனமும் தான்

கொஞ்சம் லிஃப்ட் கிடைக்குமா.

2006-09-12T05:39:00.000-07:00

அப்பா எல்லாருகிட்டயும் என் காலேஜ்ல வண்டி இருக்கு. எனக்கு மட்டும்தான் இல்ல..இப்ப ஃபைனல் இயர் கூட வந்தாச்சு. ப்ளீஸ் பா புரிஞ்சுகோங்க.அக்கா கல்யாணம் கூட முடிஞ்சு போச்சு இல்ல.

டேய் ராஜா ஏன் கோவப்படர...இந்த தடவ உன் பொறந்த நாளுக்கு கண்டிப்பா உனக்கு பைக் வாங்கிதறேன்டா. என்ன நம்புடா.

ஆமாம் போன தடவுயும் இதத்தான் சொன்னீங்க்க..

டேய் அப்ப உன் அக்கா கலயாணம் திடிர்னு முடிவாச்சு இல்ல.

சரிப்பா இந்த தடவ மட்டும் என்னை ஏமாத்திடாதீங்க.

-*-*-
ஏங்க உங்களுக்கு அறிவு கிறிவு மழுங்கிடுச்சா என்ன. பொண்ணு கலயாண கடனே திணறிகிட்டு இருக்கோம். இதுல இவனுக்கு எங்கேந்து வண்டி வாங்க போறீங்க.

லட்சுமி இத பாரு இன்னும் ஒரு வருஷம்டி...அப்புறம் அவனுக்கு வேலை கிடச்சுடும். அதுக்கு அப்பறம் அவன் அப்பா இத வாங்கித்தான்னு என்னை எதுவுமே கேக்க மாட்டான்டி. அவன் ஆசை பட்டு கேக்கறத வாங்கி தர இதான்டி கடைசி சந்தர்ப்பம் எனக்கு.

புரியுதுங்க..ஆனா பணத்துக்கு என்ன பண்ண போறிங்க..

வி.ஆர்.ஸ் குடுக்கலாம்னு இருக்கேன்டி.அதுல வர்ர பணத்துல நம்ம பொண்ணு கல்யாண கடனையும் அடைக்கலாம் அப்படியே பையனுக்கு வண்டியும் வாங்கலாம்.

என்னங்க இது யாராவது வண்டி வாங்க வி.ஆர்.ஸ் குடுப்பாங்களா.

ஒண்ணும் பெரிய நஷ்டம் இல்லடி. மாச மாசம் 6000 பென்ஷன் வரதுக்கு பதிலா 3000 வரும்.நமக்கு அது போதாதா..பையன் படிப்பு செலவு இந்த வருஷம் மட்டும்தானே அதுக்கு வி.ஆர்.ஸ்ல வர பணம் சரியா இருக்கும். நீ கவலைப்படாம நா சொல்ரத கேளு.
-*-*-*-
டேய் ராஜ்,இந்த வருஷம் உனக்கு ரொம்ப ராசிடா. புது வண்டி அப்புறம் இப்ப கேம்பஸ் இன்டர்வியுல நல்ல வேலை. நடத்துடா.

சரிடா..இன்னும் ஒரு வாரம்தான். அப்புறம் காலேஜ் லைஃப் முடிஞ்சுடும். அதான் கவலையா இருக்குடா.இனிமே நாம எல்லாரும் முன்ன மாதிரி வண்டி எடுத்து சுத்துவோமா இல்ல ஆபிஸ் வீடு கல்யாண்ம்னு இருந்திடுவோமோ.

டேய் இத பத்தி எல்லாம் நீதான் கவலைப்படணும். நாங்க வேலை கிடைக்கிரத பத்தின கவலைல இருப்போம்.
-*-*-
ராஜ்..எனக்கு கொஞ்சம் லிஃப்ட் கிடைக்குமா...ம்ம்ம்..கொஞ்சம் கோவில் வரைக்கும் விட்டுட்டு போறியா.

அப்பா..நீங்க வீட்ல சும்மாதானே இருக்கீங்க. எனக்கு நிறைய வேல இருக்கு. நா கெளம்பறேன்.

சரிப்பா நீ போ. அதை கேக்கும் வரை கூட அவன் காத்திருக்கவில்லை.

என்னங்க இது.அவனுக்காக நீங்க வேலைய கூட விட்டீங்க. ஆனா..அவன்..உங்க பொறந்த நாள் கூட ஞாபகம் இல்லாம..

லட்சுமி...எனக்கு பொறந்த நாள் கொண்டாடர வயசாடி..அவன் பாவம்..என்ன ஆபிஸ் டென்ஷன்ல இருக்கானோ..அவன் என் பையன்டி

சரிங்க..எனக்கு மனசே கேக்கல. உங்களுக்கு பிடிச்ச பாயசம் செஞ்சிருக்கேன் வந்து சாப்பிடுங்கநாம சாயந்தரமா கோவிலுக்கு போலாம்

-*-*-*
என்ன லட்சுமி விளக்கு எதுவும் போடாம வந்திட்டியா. வீடே இருட்டா இருக்கு.

இல்லீங்க போட்டுதானே வந்தேன்..கர்ன்ட் போயிருக்குமோ என்னவோ.

கதவு திறந்ததும்..

அட..லட்சுமி இவங்க எல்லாரும் என்னோட அபீஸ்ல வேலை பாக்கறவங்க. அட..எனக்கு..வார்த்தையே வரல...சந்தோஷத்துல...சார் நீங்க கூட வந்திருக்கீங்க்களா..

ஆமாம் மூர்த்தி...நீ வி.ஆர்.ஸ் குடுக்காம இருந்திருந்தனா இன்னிகுதான் ரிடையர் ஆகி இருப்ப.அதனால் இது உன் பிறந்த நாள் மட்டும் இல்ல அப்ப செய்யாத பிரிவு உபசார விழாவும் இன்னிக்குதான். எங்கப்பா..அந்த மாலை..அத கொண்டுவாங்க...

சார்...நா உங்க எல்லாருக்கும் எப்படி நன்றி சொல்லபோறேன்...

இருங்க..நன்றி எங்களுக்கு இல்ல..இத எல்லாம் ஏற்பாடு செஞ்ச உங்க ராஜ்க்குதான் சொல்லணும்..

யாரு..என் பையனா...

ஆமாம்பா...போன வருஷம் என் பொறந்த நாளுக்கு...நீங்க பரிசு குடுத்தீங்க இந்த வருஷம் நான்.அப்பா வாசல்ல கார் பாத்தீங்களா..இனிமே நீங்க எங்க போனாலும்..அதுலதான் போகணும்.

இதையெல்லாம் அமைதியாய் பார்த்து புன்னகைத்த லட்சுமிக்கு ஒரே பெருமை.

அப்பா...எனக்கு லிஃப்ட் தருவீங்களா....
சிரித்தபடி கேட்டான் ராஜ்.

டாட்டா பைபை

2006-09-06T23:42:00.000-07:00

என் சின்ன வயதில் எங்கள் வீடு இரயில்வே ட்ராக் பக்கம் இருந்தது.அப்போது தினமும் ஒவ்வொரு ரயில் போகும்போதும் வரும்போதும் நானும் என் தங்கையும் சலிக்காமல் டாட்டா காண்பிப்போம்.யாராவது பதிலுக்கு டாட்டா சொல்வார்களா என ஏங்கியிருக்கிறோம்.கடைசியில் யாரும் டாட்டா சொல்லவில்லை நாங்கள்தான் வீடு மாற்றிவிட்டோம். அந்த ஏமாற்றத்தால் ஒரு சபதம் எடுத்தேன். நான் ரயில் வண்டியில் போகும்போது எந்த குழந்தையாவது டாட்டா காண்பித்தால் நானும் டாட்டா சொல்ல வேண்டும் என்பதுதான் அது.அதுக்கு ஏத்தாப்பல நான் முதல் முதல் வேலைக்கு சேர்ந்த கம்பெனிக்கு மாம்பலத்துலேந்து தாம்பரம் வரை தினமும் ரயில் பயணம். எப்படியாவது ஜன்னல் பக்கம் இடத்தை பிடித்துவிடுவேன். எல்லாம் என் சபதத்தை நிறைவேத்ததான். ஆனால் என் சபதம் நிறைவேர முடியாதபடி எந்த பாப்பாவும் என் கண்ணில் படவில்லை. இனிமேல் ரயில் பயணமே வேண்டாம் என நான் முடிவு செய்த போது ரயில் சேனிடோரியம் நெருங்கியது அட அப்போதுதான் அந்த அதிசயம்.ஒரு வீட்டு வாசலில் குழந்தைக்கு ரயிலை காண்பித்தபடி ஊட்டி கொண்டு இருக்கும் ஒரு தாய் அந்த குழந்தை டாட்டா காண்பித்தது. அவ்வளவுதான் என் கையில் இருந்த எல்லாவற்றையும் கீழே போட்டுவிட்டு முதல் வேலையாய் டாட்டா காண்பித்தேன். ஒரே சந்தோஷம். ஒரு குழந்தையின் எதிர்பார்ப்பை நிறைவேத்திட்டேன் என்று பெருமை வேற.இப்படி தினமும் என் டாட்டா பயணம் ரயிலில் தொடர்ந்தது. முதலில் என்னை வித்தியாசமாக பார்த்தவர்கள் கூட என்னுடன் சேர்ந்து அந்த குழந்தைக்கு டாட்டா காண்பிக்க ஆரம்பித்தார்கள்.சரி இதுக்கு என்ன இப்பனு கேக்கறீங்களா வேற ஒண்ணும் இல்லை இங்க சிங்கப்பூர்ல ரயில்ல போகும்போது இந்த மாதிரி டாட்டா வாய்ப்பே இல்லைங்க.அதனால் என்னோட சேவையை!!!!! :) தொடர முடியலையேனு ஒரு வருத்தம். ஆனா இன்னிக்கு ஒரு இந்திய குழந்தை பஸ்ஸ பாத்து டாட்டா சொல்லவும் சந்தோஷம் தாங்காம நானும் டாட்டா சொல்ல பின்னாடி ஒரு குரல்...ஏங்க உங்களுக்கு என் குழந்தையை தெரியுமானு. அப்பதான் புரிஞ்சுது அந்த குழந்தை டாட்டா காண்பித்தது அதோட அம்மாவுக்குனு.ம்ம்ம்ம்ம்.....அதுக்குத்தான் மலரும் நினைவா இந்த பதிவு. சரிங்க....
இப்போதைக்கு
டாட்டா..பை பை..

முகமூடி

2006-08-28T00:22:00.000-07:00

தலை நிறைய பூவுடனும்
புன்னகையும் பொன்னகையுமாய்
பட்டே புடவையாய் பட்டு புடவையில்
போட்டிருந்த உடைமைகளா இல்லை மனமா
எது பாரம் என்று புரியாமல்
என்னவர் பக்கத்தில் நின்று
சிரித்த முகமாய்
என் திருமணத்தன்று போட்ட முகமூடி
இன்னும் கழட்டவில்லை
இன்று என் மகள் திருமணத்தில்
அவளுக்கும் ஒரு முகமூடி தயாராய்...

வாழ்த்துக்கள்

2006-08-26T07:50:00.000-07:00

அனைவருக்கும் விநாயக சதுர்த்தி வாழ்த்துக்கள்

வேலை

2006-08-23T23:40:00.000-07:00

எப்ப பாரு எனக்கு வேலை ஜாஸ்தி.இங்க ரொம்ப படுத்தராங்கன்னு நா ரொம்ப பாவம்னு சும்மா புலம்பிட்டே இருந்தேனா உடனே என் கணவர் இந்த வேலை எல்லாம் பாக்கும்போது உன்னோட வேலை எவ்வளவு நல்லதுன்னு யோசிச்சி பாருன்னு சொன்னாரு.எம்மாடியோவ் நம்ம கீபோர்டு தட்டற வேல எவ்வளவோ மேலுங்க...

முதல் ஆறு

2006-08-21T05:03:00.000-07:00

ஆறு விஷயங்களை பகிர்ந்து கொள்ள பாலபாரதி அழைத்திருந்தார். எனக்கு பிடித்தவை என்றால் அது நிச்சயமாக ஆறிலே அடங்காது குறைந்தது ஒரு அறுபதாவது தேறும். அதனால சன் டிவி டாப் டென் மாதிரி டாப் ஆறு விஷயங்களை சொல்லி உங்கள அறுக்க போகிறேன் ரெடியா!!!!

என்னை கவர்ந்த ஆறு சினிமா பாடல் வரிகள்
1.சங்கமம் படத்தில் மழைத்துளி பாட்டில் வரும்
"விழியே விழியே இமையே தீயும்போதும் கலங்காதிரு"

2.பயணங்கள் முடிவதில்லை இளைய நிலா பாடல்
"முகிலினங்கள் அலைகிறதே முகவரிகள் தொலைந்தனவோ
முகவரிகள் தவறியதால்
அழுதிடுமோ அது மழையோ"

3.திருடா திருடா படத்தில் வரும்
"புத்தம் புது பூமி வேண்டும்
நித்தம் ஒரு வானம் வேண்டும்
தங்க மழை பெய்ய வேண்டும்
தமிழில் குயில் பாட வேண்டும்"

4.வறுமையின் நிறம் சிவப்பு படத்தில் வரும் பாரதியின் வரிகள்
"நல்லதோர் வீணை செய்து அதை நலம் கெட புழுதியில் எரிவதுண்டோ"

5.கண்டு கொண்டேன் கண்டு கொண்டேன் படத்தில் வரும்
"கொஞ்சும் மைனாக்களே கொஞ்சும் மைனாக்களே"
முழுப் பாட்டும் பிடிக்கும்

6.மூன்றாம் பிறை படத்தில் வரும்
"கண்ணே கலை மானே "

இது என் மனதில் தோன்ற்ய முதல் ஆறு பாடல் வரிகள்.

மனம் குதூகலிக்க வைக்கும் ஆறு
1.அலைகள் கால்களை வருட,காற்று மென்மையாய் வீச..கடற்கரையில் ஒரு மாலை

2.ஜன்னலோரம் அமர்ந்து உறவினர்களுடனும் நண்பர்களுடனுமான தொலைதூரப் பயணம்

3.மழலைகளுடன் மழையில் விளையாட்டு

4.வெளியே மெலிதாய் மழை பெய்ய ஒரு கையில் புத்தகமும் இளையராஜா இசையும் இன்னொரு கையில் அடம் பிடித்து அம்மா கையால் போட்ட காபி

5.தெரியாத ஒருவருக்கு சின்னதாய் உதவி செய்யும்போது மலரும் அவர்களின் முகம் காணும்போது

6.என்னவருடன் 2 வீலரில் வேகமாய் செல்லும்போது...

கற்றுக்கொள்ள விரும்பும் ஆறு
1.வீணை வாசிக்க :- இது வரை ஆறு முறை வீணை கத்துக்க முயற்சித்தேன். முதல் முறை ஆசிரியை வீடு மாற்றி சென்றுவிட்டார்கள் இரண்டாவது முறை நாங்கள் வீடு மாற்றி சென்றோம், மூன்றாவது முறை வகுப்பையே நிறுத்தி விட்டார்கள்,நாலாவது முறை நான் சிங்கப்பூர் வந்துவிட்டேன், அடுத்த முறை இங்கு ஒருவரிடம் சென்றால் அவருக்கு இந்தியா மாற்றம்,ஆறாவது முறை இப்போது புது வகுப்பு ஆரம்பித்திருக்கிறார்கள் போய் விசாரிக்க வேண்டும்
2.பரத நாட்டியம் :- இல்லை இல்லை இதுக்கு வீணை மாதிரி வரலாறு எல்லாம் இல்லை. ஒரு போது கற்று கொண்டிருந்தேன் ஆனால் பாதியில் நிறுத்தி விட்டேன்
3.தமிழிலும் அங்கிலத்திலும் ஒழுங்காய் எழுத :- நானும் எழுதுகிறேன் பேர்வழி என்று கிறுக்கி கொண்டு இருக்கிறேன். ஆனால் ஒழுங்கான அழகான படைப்புக்கள் எழுத ஆசை.
4.ட்ரம்ஸ் ட்ரம்ஸ் :- சமீபத்தில் சிவமணியின் நிகழ்ச்சி பார்த்ததில் இருந்து ட்ரம்ஸ் கற்றுக்கொள்ள முடிவு செய்துள்ளேன்.நீ சமையல் அறையில் இருந்தாலே ட்ரம்ஸ் வாசிப்பது மாதிரிதான் என என் கணவர் சொல்வது வேறு விஷயம்.
5.சமைக்க - இல்லிங்க நா கொஞ்சம் சுமாரா சமைப்பேன். இருந்தாலும் இன்னுமே நல்லா சமைக்க கத்துகிட்டு நல்ல பேர் வாங்கணும்னு ஆசை
6.டென்னிஸ் - எல்லாம் சானியா மிர்ஸாவ பாத்தததுலேந்து இதுவும் ஒரு ஆசை.இதுல வேற என் கணவருக்கு நல்லாவே ஆடத்தெரியுமா அதனால இப்ப அவருதான் என் கோச்.

எனக்கு பிடித்த பொழுது போக்கு ஆறு
1.அரட்டை - வயது வரம்பை பார்க்காமல் அனைவருடனும் வெட்டியாக அரட்டை அடிப்பதில் உள்ள சுகமே தனி. அதுவும் அது வெட்டியான விஷயமாக இருப்பது is a must
2.சண்டை - என் தங்கையுடன் சண்டை போடுவது என்றால் அது அல்வா சாப்பிடுற மாதிரி அவ்வளவு பிடிக்கும்.
3.ஊர் சுத்துதல் - நன்பர்களுடனும் ,உறவுகளுடனும் ஊர் சுற்றுவது ஜாலீ
4.படிப்பது - இப்பதான் உருப்படியா ஒண்ணு சொல்லி இருக்கேன்னு சொல்றிங்கதானே.
5.இசை - நா பாடினாலும்? பிடிக்கும் மத்தவங்க பாடுறத கேக்கவும் பிடிக்கும் எப்பவும் ஏதாவது ஒரு பாட்டு ஒடிகிட்டே தான் இருக்கும்
6.கிறுக்கல் - இதோ இப்ப எழுதிட்டு இருக்கேனே இந்த வேலையும் ரொம்ம்ம்ப பிடிக்கும் (மத்தவங்களுக்குதானே கஷ்டம்)

ஆறு உணர்ச்சிகள்
1.கோபம் - வயசானவங்கள கஷ்டபடுத்தர யாரைப் பார்த்தாலும் கோவம் பொத்துகிட்டு வரும்
2.சந்தோஷம் - நா சின்ன சின்ன விஷயத்துக்கே ரொம்ப சந்தோஷப்படுவேங்க.இருந்தாலும் இப்ப சமீபத்துல ரொம்ப சந்தோஷப்பட்டது குங்குமம் இதழ்ல கவிதைய பாத்தபோது. கெளதமுக்கு தாங்க்ஸ்
3.வருத்தம் - அப்பா அம்மா தங்கை மாமியார் மாமனார் இவங்கள விட்டுட்டு தூரமா இருக்கோமேன்னு வருத்தம்
4.வெறுப்பு - அய்யோ ஊர்வன எதை பாத்தாலும் நமக்கு வெறுப்புதாங்க
5.சிரிப்பு - இத கேட்டா புரியும் http://raasukutti.blogspot.com/2006/08/blog-post_23.html
6.ஆச்சரியம் - என்னை ஆறு விஷயங்களை சொல்ல பாலா அழைச்சது

அழைக்க விரும்பும் ஆறு பேர்
ஆறு பேருக்கு ஈடான நம் கோகோ

உதவும் கரங்கள்

2006-08-21T03:27:00.000-07:00

சமீபத்தில் எங்கள் நிச்சயதார்த்த anniversary ? வந்தது.
ஏதாவது ஒரு காரணத்த கண்டுபிடிச்சி கொண்டாடரதுல,
என் கணவரும் நானும் நல்லாவே போட்டி போட்டுக்குவோம். அந்த நாள கொண்டாட
ஒருத்தருக்கு ஒருத்தர் பரிசு குடுத்து கலாட்டாவா இருக்கும்.
இந்த முறை என்னவருக்கு என்ன வாங்கலாம்னு யோசிச்சி கடைசில வழக்கம் போல ஒரு
சட்டையும் கார்டும் வாங்கி குடுத்தேன்.அவரும் அத வாங்கிட்டு தேங்ஸ்னு சிரிச்சிட்டு போயிட்டார்.
எனக்கு என்ன வாங்கினீங்கனு நா கேட்டதும் நானே உனக்கு பரிசுதானே ஒரு டயலாக் வேற
சரீன்னு ஆபிஸ் கிளம்பி வந்துட்டேன்.
சரியா லஞ்சு டைம்ல உதவும் கரங்கள் வித்யாகர் கிட்டேந்து ஃபோன்
உங்களுக்கு anniversary வாழ்துக்கள் நீங்க சொன்னபடி 100 குழந்தைகளுக்கு இன்னிக்கு வடை பாயசத்தோட சப்பாடுன்னு சொன்னதும் எனக்கு ஒரு நிமிஷம் ஒண்ணுமே புரியல.
எல்லாமே புரிஞ்ச சிரிப்போட என் கணவர்..
எப்படி இருக்கு என் பரிசுன்னு சொன்னதும் வார்த்தை இல்லை என் சந்தோஷத்தை விவரிக்க
என் கணவர் எனக்கு தந்த அற்புதமான பரிசு அதுதான்.
Check it out.
http://www.udavumkarangal.org/surprise.htm

கனவு

2006-08-20T20:57:00.000-07:00

சனி ஞாயிறு தவிர்த்து
மற்ற எல்லா நாட்களும் விடுமுறையாய்
சீருடை இல்லாமல்
கலர் கலர் உடைகளாய்
பள்ளியில் எட்டில் ஆறு வகுப்பு
விளையாட்டுக்கு மட்டுமாய்
பரிட்சை என்பது
வரலாறு பாடத்தில் ஒரு பாடமாய்
புதிதாய் சில விதிமுறைகள்
கண் திறந்தால் இந்த இனிய
கனவு கலைந்துவிடுமாதலால்
கண் திறக்காமல் சிரிக்கும் நான்.

பயணம்

2006-08-14T19:37:00.000-07:00

அமைதியான நீரோடை
அங்கே ஓர் இசையாய் கொட்டும் அருவி
வழி காட்டி பறந்து செல்லும் ஜோடிப் பறவைகள்
சுற்றிலும் பச்சை பசேலென இயற்கை வளம்
சில்லென்று காற்று என்னோடு காதல் மொழி பேச
என்னை வரவேற்க ஒரு வானவில் காத்திருக்க
இப்படி இனிதாய் நான் ஓடத்தில் தினமும் பயணம் செய்ய
சீக்கிரம் எழுந்திருடி 8:30 மணி பஸ் போயிடும்
என் கனவுப் பயணத்தை கலைத்த அம்மா
தயாரானேன் நான் நிதர்சனமான நெருக்கடி பேருந்து பயணத்துக்கு

சுதந்திர தின நல்வாழ்த்துக்கள்

2006-08-14T05:23:00.000-07:00

அன்று அர்த்தம் தெரியாமல்
சாக்லெட்டுக்காக மட்டுமே கொண்டாடிய திருநாள்
இன்று அர்த்தம் புரிந்தவுடன்
சுதந்திரமே சாக்லெட்டாய்...

அனைவருக்கும் என் இனிய சுதந்திர தின நல்வாழ்த்துக்கள்

உறவுகள் சுகம்

2006-08-13T06:27:00.000-07:00

களைத்து போய் கண் மூடும் வேளையில்
அம்மாவின் அரவணைப்பு சுகம்
இரவு 12 மணிக்கு ஜுரம் வந்தால்
ஒடி போய் மருந்து வாங்கி வரும் அப்பாவின் பாதுகாப்பு சுகம்
இருட்டரதுக்குள்ள வீடு வந்து சேரு
கவலையில் சொல்லும் பாட்டியின் அக்கறை சுகம்
என் பேத்தி என்றும் புதுமை பெண்
என வசனம் பேசும் தாத்தாவின் பேரன்பு சுகம்
சண்டை போடவே பிறந்தாளோ என சந்தேகம் வந்தாலும்
என் வெற்றி கண்டு பூரிப்படையும் என் தங்கையின் பாசம் சுகம்
தன் சேமிப்பை கரைத்து ராக்கி அன்று
என் கையில் பரிசை தரும் அண்ணனின் ஆதரவு சுகம்
என் சந்தோஷம் மட்டுமல்ல துக்கத்தையும் பகிர்ந்து கொள்ளும்
தோழிகளுடனான உரையாடல் சுகம்
அவர் விரும்பும் மாங்காய் தொக்கு செய்ய முடியாமல் திணரும்போது
அன்போடு உதவி செய்யும் மாமியாரின் மனமே சுகம்
மருமகளை மகளாய் பார்த்து
உரிமையோடு அறிவுரை கூறும் மாமனாரின் வார்த்தை சுகம்
கண்ணீர் துளி ஒன்று சிந்தினால்
பதறிப்போய் என்னோடு கண்ணீர் சிந்தும் என்னவரின் துணை என்றென்றும் சுகமே
குற்றம் மறந்து சுற்றம் மட்டுமே பார்த்தால்
வாழ்வெல்லாம் என்றென்றும் சுகமே

தேடல்

2006-08-11T02:17:00.000-07:00

எந்த ஓரத்தில் இருந்தாலும்
யார் கண்ணிலெ பட மறுத்தாலும்
என் கைகளுக்கு மட்டுமே கிடைக்கும்
தொலைந்து போன திருகாணி
கீழே விழுந்த சட்டை பொத்தான்
ஊர்ந்து செல்லும் சிட்டெறும்பு
அப்பா தவற விட்ட பத்து பைசா
இப்படி ஏதேதோ என் கைகளில் கிடைக்க
நான் தேடும் மிட்டாய் மட்டும் கிடைக்கவில்லை
விடுவதாய் இல்லை இன்று
எப்படியும் கண்டுபிடித்தே தீருவேன்
இதோ என் தேடல் ஆரம்பம்

பாதை

2006-08-09T22:18:00.000-07:00

என் கண் முன்
காண்பிக்கப்பட்டது இரு பாதைகள்
இரண்டிலும் காலடி சுவடுகள்

எந்த பாதை தேர்வு செய்ய
மனம் அறிவைக் கேக்க
இரண்டிலும் பயணித்த அனுபவம் எனக்கில்லை
என அறிவு மெளனம் சாதிக்க

ஆலோசனை கேக்க தந்தையை நாடினால்
தான் பயணித்த பாதை
நானும் தேர்வு செய்ய அவர் கூற

அதை கேட்ட என் தாய்
அவர் பயணித்த பாதையின் பலனை எனக்கு கூற
மூண்டது அவர்களிடையே சண்டை

செல்ல வேண்டிய இடம் தெரிந்தால்
பாதை தேர்வு செய்வதா கடினம்
மூலையில் முடங்கிய தாத்தா குழப்பம் தீர்த்தார் நொடியில்

இரண்டு பாதையும் விட்டு விட்டு
தேர்வு செய்தேன் மூன்றாவதை
இன்று ஆசிரியைஎன்ற முத்திரையில் நான்
சற்றே வருத்தத்துடன் ஒரு டாக்டரும் இஞ்சினியரும்
அதாவது என் பெற்றோர்கள்

நிலா நிலா ஓடி வா

2006-08-09T20:21:00.000-07:00

என் செல்லம் இல்ல
என அம்மா கொஞ்ச
எனக்காகடி கண்ணா
என அப்பா கெஞ்ச
பக்கத்து வீட்டு பப்பிக்கு பேச கூட வராது
என என் தாத்தா
என் பேத்தி நா சொன்னாதான் கேக்கும்
என என் பாட்டி
வந்த சுற்றம் என்னை
சுற்றி நின்று கை தட்ட
இப்போதேவா இல்லை இன்னுமொரு
சாக்லெட் கேட்ட பின்னா என்று சிந்தித்தபடி
சிணுங்கலுடன் ஆரம்பித்தேன்
என் குரலில்"நிலா நிலா ஓடி வா"

காத்திருக்கிறேன்.

2006-08-04T03:59:00.000-07:00

களைத்து இருக்கும் முகங்கள்
கலைந்து செல்லும் சிறுவர்கள்
இங்கொன்றும் அங்கொன்றுமாய் சில வண்டிகள்
குரைத்துக் கொண்டு இருக்கும் நாய்
மெதுவாய் மறையும் சூரியன்
கொஞ்சம் பசியுடன்
கொஞ்சம் கோவத்துடன்
வழக்கம் போல் வாசலில் காத்திருக்கும் நான்
அலுவலகம் சென்ற என் அம்மாவின் வருகைக்காக

நட்பூ

2006-08-02T23:59:00.000-07:00

வாடாதது
இந்த காகிதப் பூக்கள்
மட்டும் அல்ல
நம் நட்பு(பூ)ம் தான்

தமிழ் மணம் பரப்பும் நண்பர்களுக்கு(முன்கூட்டியே)என் நண்பர்கள் தின வாழ்துக்கள்

சுமை

2006-08-02T20:17:00.000-07:00

பத்து மாதம் வயிற்றிலே சுமந்து
பின்னர் தன் தோளிலே சுமந்து
என்றென்றும் தன் நெஞ்சிலே
உனை சுமக்கும் தாய்
உனக்கு சுமையானால் தாங்கமாட்டாள்
உன் சுமையை
இந்த பூமித்தாய்

மனிதம்

2006-08-01T22:12:00.000-07:00

ஐயோ வியர்வை!
பூக்களின் மீதுபனித்துளி பார்த்து பதறிய மனிதம்,
இன்று...அதே பூக்களைகசக்கவும் தயாராய்!!!

என் கிறுக்கலை கவிதையாய் மாற்ற
ஆலோசனை கொடுத்த கௌதமுக்கு நன்றி

நிலா

2006-08-01T20:53:00.000-07:00

அட இன்று அமாவாசை என்றார்கள்

பின் இந்த நட்ச்சத்திரங்கள் யாரைப் பார்த்து கண் சிமிட்டுகின்றன

ஓ என்னவள் மொட்டை மாடியில் படித்துக்கொண்டு இருக்கிறாளோ!!

பரிட்சைக்கு நேரமாச்சு

2006-07-31T00:39:00.000-07:00

மணி ராத்திரி 10 ஆகிடுச்சு. நாளைக்கு 8 மணிக்கு கிளம்பினாத்தான் பரிட்சைக்கு சரியான நேரத்துக்கு போக முடியும்.
ஆனா இன்னும் படிக்க வேண்டியது ஏகப்பட்டது இருக்கு. ஏதோ சொத்து சேத்து வைக்கறா மாதிரி சேத்து வச்சிருக்கேன் எல்லாத்தயும் கடைசி நிமிஷத்துல படிக்க. இன்னும் படிக்க நிறைய இருக்கேன்னு யோசிச்சி யோசிச்சே இன்னும் கொஞ்ச நேரத்த வீணடிச்சேன். கடைசீல அந்த பதட்டத்தோடயே பரிட்சைக்கும் கிளம்பிட்டேன். இன்னும் ஒரு 30 நிமிஷம் இருக்கு அதுல இத படிக்கலாமா இல்ல அத படிக்கலாமான்னு கடைசீல ஒண்ணும் படிக்கல. சரியா 9 மணிக்கு மணி அடிச்சதும் உள்ள நுழைஞ்சுட்டேன். உள்ள போனா நா கொண்டு போன பையில hall ticket தவிர மீதி எல்லா குப்பையும் இருக்கு. எப்பவோ தொலைஞ்சி போன திருகாணி கூட கிடைச்சுது ஆனா அதுக்கு சந்தோஷப்பட கூட முடியாம இந்த டென்ஷன். என்ன செய்யலாம்னு கண்ணு கலங்கி நின்னா வேர்த்து விருவிருக்க அப்பா நிக்கறார் அவர் கையில hall ticket
ஒரு சின்ன அர்ச்சனை செய்துட்டு கூடவே நல்லா எழுதி தொலைனு!! வாழ்த்திட்டு போனாரு.
இந்த கூத்தெல்லாம் முடிய ஒரு 30 நிமிஷம்.சரின்னு மனச தேத்திக்கிட்டு கேள்வித்தாள பாத்தா அதுக்கும் நமக்கும் ஒரு சம்மந்தமும் இல்லங்கர மாதிரி இருக்கு. அந்த சோகத்துல இன்னும் ஒரு ஒரு மணி நேரம் ஓட கடைசி பக்கத்த பாத்தா நமக்கு தெரிஞ்ச ஒரு நாலு கேள்வி சந்தோஷம் தாங்கல உடனே பக்கம் பக்கமா முதல் கேள்வி எழுதி முடிக்கறேன் அதுக்குள்ள மணி அடிக்க ஐயோ நாம ஒரு கேள்விதானே முடிச்சோம்னு நா அழ ஆரம்பிக்க.....

ஏண்டி சாயங்காலம் தூங்கறதே தப்பு இதுல உனக்கு கனவு வேறயா....எந்திரி அஞ்சலி எந்திரி அஞ்சலின்னு மணிரத்னம் ஸ்டைல்ல அம்மா எழுப்ப ஓ எல்லாம் வெறும் கனவான்னு ஒரு பக்கம் சந்தோஷமா இருந்தாலும் எனக்கு எப்ப பரிட்சை இருந்தாலும் இந்த கனவு கரெக்ட்டா அட்டெண்டன்ஸ் குடுத்துடும் சில சமயம் இந்த கனவ வெச்சிதான் எனக்கு பரிட்சை இருக்குங்கறதெ நியாபகத்துக்கு வரும்னா பாத்துக்கோங்க.

சரி சரி..இப்ப என்ன பரிட்சைன்னு தானே கேக்கரிங்க...எல்லாம் சம்பாதிக்கற கொழுப்புல சேந்த MBA தாங்க.

இந்த பரிட்சை வந்தா ஒரு சந்தோஷம் என்னன்னா வீட்ல ராஜ மரியாதை கிடைக்கும் ஒரு வேலை செய்ய வேண்டாம்.(இல்லன்னா மட்டும் எதுவும் செய்திரப்போரதுல்ல...ஆனா இந்த சமயத்துல ஒரு குற்ற உணர்வு கூட இருக்காது பாருங்க)

இதுல இன்னொரு வசதி என்னன்னா ஒரு காலத்துல என்னை திட்டணும்னு எங்க அம்மா முடிவெடுத்தாங்கன்னா அது இப்படித்தான் இருக்கும்..படிடீ படிடீ படீ..ஆனா இப்ப நாமளே புத்தகம் எடுத்தா கூட ஏம்மா இப்பதானே ஆஃபீஸ்லேந்து வந்த கொஞ்சம் ஓய்வெடுனு சொல்றாங்க (அவங்களுக்கு எப்படி தெரியும் நம்ம கைல இருக்கறது MBA புத்தகம் இல்ல..பாரதியார் கவிதைகள்னு)

இந்த விகடனோ இல்ல ஏதாவது ஒரு தமிழோ இல்ல ஆங்கில நாவலோ கையில இருந்தா அது படிச்சி முடிக்கறவரைக்கும் தூக்கத்துக்கும் நமக்கும் ஒரு சம்மந்தமும் இருக்காது. ஆனா பாருங்க இந்த பாடம் சம்மந்தமா எந்த புத்தகத்த எடுத்தாலும் தூக்கம் அப்படியே கண்ண சுழட்டும்...

இப்பதாங்க கைல புத்தகத்த எடுத்தேன் ஒரே தூக்கம் தூக்கமா வருது..அம்மா கையால ஒரு காபி சாப்பிட்டு படிக்க ஆரம்பிக்கணும். அதனால இத்தோட என் அறுவைய முடிச்சிக்கறேன்.

முதுமை

2006-07-29T23:08:00.000-07:00

பாசம், நன்றி மறந்து போன சில வார்த்தைக்கு
அவசர தேவை ஒரு பெயர் சூட்டு விழா !!!!
சமீபத்தில் இந்தியா சென்ற போது முதியோர் இல்லம் செல்ல நேர்ந்தது. அங்கு இருந்த ஒவ்வொரு நிமிடமும் மனதில் எதோ ஒரு இனம் தெரியாத வலி. இன்றைய அவசர உலகில் எவருக்கும் நேரமில்லை. தம் குழந்தைகளை கவனிக்கவே நேரமில்லாத போது எங்கே இருந்து வயதான பெற்றோர்களை கவனிக்க நேரம். ஆனால் அந்த இல்லத்தில் இருந்த ஒவ்வொருவர் கண்களிலும் ஒரு தேடல், தவிப்பு , ஒரு வலி, ஒரு ஏக்கம். இன்னும் பலர் ஏதோ இப்படி ஒரு நல்ல முதியோர் இல்லத்தில் தங்கள் பெற்றோர்களை சேர்த்து வைப்பதன் மூலம் ஏதோ சாதித்து விட்டது போல் நினைக்கிறார்கள். ஒரு நாள் நமக்கும் இப்படி ஒரு நிலை ஏற்படும் என்ற எண்ணம் ஏன் தோன்றுவதில்லை. ஒரு வயதானவர் தலையில் கட்டு போட்டு இருந்தது. ஆனால் அவர் முகத்தில் ஒரே சந்தோஷம். என்ன தாத்தா வலி இப்ப கம்மி ஆச்சா என்று கேட்டேன். வலியே இல்லம்மா. ஏதோ இந்த அடிபட்டதால் என் பசங்க என்ன வந்து பாத்தாங்க அந்த சந்தோஷம் போதும்மா என்றார். மனசு வலித்தது. இனி வரும் தலைமுறைக்கு பாசம், உறவுகள் இவை எல்லாம் சரித்திர பாடமாய் மட்டுமே இருக்குமோ?

நினைத்தாலே இனிக்கும்

2006-07-29T06:18:00.000-07:00

ஜன்னல் ஓரம் உட்கார இடம்
மென்மையாய் தழுவும் காற்று
அப்போது வீசும் சாரல்
மெதுவாய் தோன்றும் வானவில்
ஓர் கையிலே கவிதை புத்தகம்
மட்றொன்ட்றில் சூடாய் தேனீர்
பக்கத்தில் மழலையின் தேன் குரல்
நிற்காமல் செல்லும்
இந்த ரயில் பயணம்
நினைத்தாலே இனிக்கும் என்றென்றும்

பெயர்

2006-07-29T06:07:00.000-07:00

என் காதல் மடலில்
உன் பெயர் எழுத மனம் வரவில்லை
எழுதும்போது உன் பெயருக்கு வலிக்குமோ என....

மனிதம்

2006-07-29T04:03:00.000-07:00

பூவின் மீது பனித்துளி பார்த்து

பூக்களுக்கு வியர்வையோ என பதறிய மனிதம்

இன்று

பூக்களை கசக்கவும் தயாராய்